Wiej laeft in ‘n tied dat aoveral ’n waardering an-ehangen
mot wodden met ‘n pries. Sportmannen en -vrouwen van ‘t joor, priezen veur culturele
projecten, acteurs en artiesten, veur ’t grootste talent, de beste musical, ’t beste
leedje, ’t beste interview, de beste website. Iej könt zo gek neet bedenken of ‘t
mot met gold behangen wodden.
Wat den enen mooj of goed vindt door twiefelt ‘n ander an. Zo’n
verkiezing kan dus onmeugelek objectief verlopen as de zwemster wodt vergeleken
met de wielrenster en de judoka. Iej könt oe dus afvraogen wat of ’t nut is van
zo’n (media)feest en wee wodt door better van? Deurgaons is ‘t zo dat alle
kandidaten toppers bunt en doorbie; met ’n top-drie score van 35-33-32 volgt ’n
winnaar dén alle andach krig en liek ‘t asof de rest niks meer veurstelt. Dat
besteet neet.
Ooit was der ’n dreekoppege jury van ‘n poëziewedstried. Zee
beoordelen de inzendingen elk apart en stellen elk eur aegen top tien saamm.
Wat bleek: der was gin enkele aovereenkomst tussen de lieskes. Der waarn dus,
volgens eur gezamenleke oordeel, darteg kandidaten dee-t genomineerd konn
wodden veur de hoofdpries. De jury met de hande in ’t hoor: zee hadden ehaopt
op ’n dudeleke winnaar. Ton wodden ‘t tied um ‘objectieve’ criteria op te
stellen en bunt ze van niejs begonn. Wat iemand zelf den moojsten of den besten
von was neet meer belangriek.
Smaak is persoonsafhankelek, met strakke beoordelingsregels wodt
’t gevuul weg-ehaald. Da’s anders in ‘n competitie woorin de meeste winstpunten
‘n kampioen oplevert; door kan gin mense umhen. ‘n Gedicht dat buten de boot is
evallen kan zomaor baovenan hebm staon bie één van de juryleden. Zölt zee
zichzelf dan nog herkenn in de uutslag? Alle wieze commissies maakt
ongetwiefeld naor eer, geweten of protocol eur keuzes, maor iej könt der neet
ummehen dat waardering völle varianten kent. Dat maakt ’t raar um eretitels en
prieze veur de beste dit of dat too te kenn. Dat hol ik altied in gedachten at
der weer ’s ’n uutslag van ‘t één of ander langskump dén miej de wenkbrauwen
dut fronsen.
