Kunst of.....

 

  

Kunst as kunst bekieken bliekt veur heel völle mensen moejlek. Wiej wilt geerne metene könn zeen wat ’n schilderiej of beeld  veurstelt. Onze harsens bunt bliekbaar neet in alle gevallen emaakt um zomaor ‘verbeelding ‘ op te ropen. Mien vrouw hef ’n schilderiej emaakt van ’n zandweg met beume: in de kleurn gael, oranje en blauw. ’t Henk as pronkstuk in de kamer  Sommegen vindt ‘t prachteg andern knikt belaefd, of ze beume zonder gruun blad waardeert blif dan ondudelek.

In Denemarken is ’n kunstwark, ’n beeld van de zeemeermin, anleiding veur geruuzie. ’t Beeld steet der inmiddels ‘n kleine twinteg joor en noe breg ’t preutse voksdeel ons trugge naor de joren viefteg; zee stäört zich deran. ’n Zeemeermin is ’n vrouwnfiguur zonder klere. In dit geval ok nog in ware proporties

uut-ehouwen, in mooje lijnen. Ooit wodden ’t zonder weerstand as kunst umarmd. Noe vindt sommegen ‘t porno en wilt ‘t afserveern. Luu hebt der mäöjte met de schoonheid te zeen. Ik vraoge mien af of ze wel ‘s in ‘n museum bunt ewes en wark van Rembrandt, Klimt of Picasso hebt bekeken. Van degene dee-t van disse zeemeermin van de leg raakt betwiefel ik dat.

Ieders mening mag eheurd wodden, maor iej hooft neet veur ’n ander te bepaolen wat wel of neet gepast is. De schilder en de beeldhouwer mot naor aegen idee könn verbeeldn wat zee ons wilt laoten zeen. De schriever en de dichter geeft inhold an eur wark met aegen woorden. Creativiteit en onafhankelekheid is de autonome wereld van de kunstenaar. Wat e maakt mag  mooj of lillek evonn wodden, maor ‘n moreel oordeel is ongepast.

Eeuwmlang is ons via kunst de weg ewezen naor de ontdekking van de vrieje geest. Wee uut is op macht hef door ‘n haekel an; met verbod en sanctie wilt ze geerne biestuurn. He’w dat wel op tied in de gaatn? Lao’w waakzaam blieven! Ik las ‘n peiling aover de Deense meermin. De meeste stemmers vuult gin bezwaor, de rest twiefelt of ruumt ‘m lever metene op. Dát deel raoj ik an: gao ’s ’n paar keer naor ’n museum um te ontdekken wat kunst met oe kan doon.