Nao disse waeke hoof ik miej veer waeken lang neet druk te
maken met stukskes schrieven veur de krante. Ik haope dat der aover ’n maond
wat positiefs te melden is aover de toestand in ons land. Da’w in
verkiezingstied neet egijzeld wodt deur partiejen dee-t maor één onderwerp op
eur programma hebt staon; chaos veroorzaken! Dat de roop um medemenselekheid is
eheurd. Dat bescherming neet allene veur aegen volk is bedoeld. Dat der allene
nog serieuze deskundegen as taofelgast in praotprogramma’s zit. Dat ’t
ophöldt met metzweven op de woelege baren van ongenuanceerde schreeuwerieje. Dat
elkene zelf geet naodenken eer-t-e achter de meute anlöp. In Oost Nederland
he’w van beide recent de veurbeelden met-emaakt in Zwolle en Zutphen. Den énen kan
de druk van buten an, andern draejt as ‘n blad an de boom at ’t lasteg wodt.
Der wodden vrogger wel ’s ezeg: de Achterhoeker is as ’n
akker met rogge: woor de wind ok vandan kump hee bög altied met. Artiesten uut
de aegen regio dee-t weigern bie de Zwatte Cross op te treden, trokken eur
besluut net zo makkelek weer in. Zo de wind waejt, waejt mien jesken! Ik bun trots
op de regio van mien afkomst, maor van zuk gezwabber krab ik miej achter de
oorne.
De haope blif da’w nao de zommer met ons allen in rösteger
vaarwater terechte komt. Dat ’t leger van voetbalanalisten zal wodden
minimaliseerd bevobbeld. Woorumme? Noh, umdat dee wiesneuzen tevölle zendtied
kriegt en ’n bussines model maakt van mekare an de praot hollen. ’t Voetbal spelletje
zelf blif leuk, maor ‘deskundegen’ zonder serieuze boodschap, dee-t altied zuukt naor details dee-t misgaot of anders
zoln motten, dee kö’w wel missen. Zee meent allemaole toptrainer te waen, maor
zee hebt gin enkele zeggenschap aover welke spits en keeper der wodt op-esteld.
Dán interesseert ‘t miej wieter gin ene biet welke mening de Van der Vaarts en
Hooijdonks derop naoholdt. Wiej gaot noe ’n maond vakantie hollen, kö’w naodenken
aover wat belangriek is en haopen dat de weerld der straks better uutzut? Of
dat lukt? Mmm….!
Geen opmerkingen:
Een reactie posten