’t
Wereldkampioenschap voetbal lig alweer achter ons. Ik geve iederene geliek dee
van mening is da’w neet hadden motten metdoon. En toch, ’t spelletje is te leuk
um neet te kieken. Ik hebbe altied net iets meer sympathie veur de ‘verwachte
verlie:zer’ (underdog). Veural as den onverwacht mooi spel op de matte leg of met
’n leeuwmhatte de stried angeet. Dat geldt neet as Nederland spölt, dan bun’k
zo chauvinistisch as wat. Net as dee andere 17 miljoen betweters in dit land.
Met
acht van dee 17 miljoen kenners van ‘t spelletje he’w Nederland tegen
Argentinië ekeken. Opwinding, frustraotie aover de scheidsrechter en ‘t
klaenste menneke op ‘t veld, teleurstelling, argernis, berusting; alle emoties
kwamm langs. Nao ‘de elf meter’ den ons onderstebaovm blees, wodden ’t oorlog. Sport
verbroederd wodt wel ’s ezeg. Door was nao afloop weineg van te marken, wat ’n
idioten!
Dat
klaene Argentijntje won de wedstried, met geluk. Met zien compaann meppen e de
tegenstander doornao letterlek van ‘t veld. Bliekbaar dech e koning, keizer en
admiraal tegelieke te waen, maor wieter dan ’t trappen teegn ‘n balle schient ‘t
intellect neet te reiken. A’j zo’n grote voetballer bunt as wodt ezeg, dan he’j
oe te gedraagn; umda’j veurbeeld bunt veur de jeugd van de hele wereld.
De
‘grote‘ voetballer uut Portugal, dee ’t umgekeerde. Jankend as ’n klein kind
maken e dat e weg kwam, ton e verloor. Zien teleurstelling kan’k snappm, maor
ik zagge krokodillenträöne; der wodt efluusterd dat e op zien olden dag 200 miljoen
geet ophaaln in één of ander öllieland. Of ’t ech woor is mo’w nog zeen.
Volgens
sportbestuurders breg ’n groot sportevenement mensn saamm in vrae en hef ‘t niks
met politiek van doon. Quatsch!! Alles draejt um imago van regimes en wodt met
tevölle geld ekoch: Sotsji, Beijing, Qatar. Veur ’t oge van de waerld wil ‘n bedenkelek landsbestuur
zich hooguut dree waeke humaan gedraagn. Ons antwoord: wiej zit plechteg näöst één
of andere bobo, met ’n protestspeldje op ‘t revers, maor dan wel verstopt onder
’n sjaal.
Wee
van mening is da’w dree waeken lang ’n sportief spelletje keken, hef neet begreepm
da’w der weer ’s bunt in-etuind.
Geen opmerkingen:
Een reactie posten