Koffie met woz

Stuksken (column) Bathmensekrant/DeGids 22meert 2023

Op donderdagmonn spraek ik  ’n groep luu, min of meer laeftiedsgenootn. De biejeenkomst begint  met koffie en ‘t deurnemm van ’t actuele niejs. ‘t Anslagbiljet van Tribuut is de leste tied onderwerp van gesprek,  ‘t blif de gemoederen al waekenlang bezegholln. De woz weerde hef invloed op gemeentelek heffingen en de inkomstenbelasting. De mäöjte weerd um ’t der aover te hebbm. Woor iederene probleemm met hef: de extreme verhoging in één joor tieds.  30 of 40 % bleek gin uutzundering en de zogenaamd vergeliekbare woningen in ‘t rapport bunt neet te begriepm. ’t Liekt derop dat bewust (te) duur verkochte huze as maotstaf bunt enomm.

Ene van de groep had ’n tillefoontje epleegd met ’n verantwoordeleke taxateur, den zol könn uutleggn woor dee butenproportionaliteit vandan kump. Der volgn gin bevredigend en acceptabel antwoord. Betjen geneuzel aover modellen, marktwarking, ligging en meugeleke nieje veurzieningn. Dat leste is vremd, want ‘n taxateur is nooit aover de vloere ewes en de badkamer en keuken zit der al twinteg joor in. Veur den man an de tillefoon was dat niejs. Hee had wat op zien toetsenbord erammeld en der rolln ‘n nieje beraekening uut zien computer. De weerde zakken met tientallen duzenden euro’s. Met de warkelekheid had ‘t nog immer niks van doon.

De aoverheid schient bie regelingn veur ’n groot publiek niks te könn zonder modelln. De toeslagenaffaire is ’n veurbeeld hoo dat uut de hand kan loopm. Ok in ‘t geval van de Woz wodt beoordeeld en eraekend met de Franse slag. Iej stopt der wat algemeenheedn in en dan kump der onverkloorbare bagger uut, dat de instanties as woorheid mot verkoopm. ’t Systeem is heileg.

‘t Veurdeel van ‘n anpassing van de weerde levert de gemiddelde woningbezitter hooguut ’n paar tientjes of 100 euro op. Wat de meeste luu stek is ’t gemak of zoa’j wilt de onverschillegheid woormet de weerde wodt vast-esteld. ’n Weldenkend mense zol op veurhand ’n reëel bedrag noteern; dan kriej minder hellege luu an de tillefoon, minder bezwoorschriftn te verwarken en wek iej vertrouwn op. Wiej bunt in dit land bezaeten van moeilek doon; de woz zal dus nog wel ’n tiedjen koffiepraot blievm.