Veur mien verjeurdag, alweer ’n
paar maond trugge, kreeg ik de taalkalender van ‘Onze taal'. Dat is 'n
scheurkalender met taalgekkegheid uut Vlaanderen en Nederland. 't Leuke is ok
nog ‘s dat der elke maondag iets op zo’n blaadje steet aover ‘n dialect.
Dreehonderd en viefenzesteg daagn, elken dag 'n papierken met vremde woorden, gezegdes en uutleg van de
herkomst dervan. 't Bast ok van de kronkelnde hassenspinsels woor at schrievers
van advertentieteksten en persberichten ons op trakteert. Jourrnalistieke
redacties könt der ok wat van. Eén zo’n pagina van de kalender is 'n flinke
training veur de lachspiern; 't gif vermaak en is leerzaam tegelieke.
Wat te denkn van de reclame veur
‘Sokken veur mansluu dee-t bie mekare blieft in de wasse' of ‘Kaerl schaamt zich veur de sneakers dee-t e
neet dreg in zien kleernkaste.’ Hoo zol dat egaone waen met de ‘Hengeloër den
is op-epakt nao 'n mislukte achtervolging deur 'n gekanteld politiebusje’.
Daorna volgen nog niejs aover 't milieu: ‘zwaore verontreineging nao lozing
crimineeln.’ As schriever kö'j jaloers wodden op zovölle taalkundege
creativiteit, maor jao, wee begrip oe dan nog.
Zoas met alles bunt der luu dee
vindt dat de taal met al dee sloddege fratsen wordt verrinneweerd, andern könt
der smakelek umme lachen en haalt de scholders der aover op. O, jao:
verrinneweren da’s ’n dialectische verbastering van ruïneren.
En dan de kwisvraogn. In welk
land wodt de meeste taaln espraoken? Van wee is de uutspraak ‘De leugen
regeert?' In welk joor is dat uut-espraoken? Zeuk ‘t maor ‘s op, 't bunt
leuke weetjes en mangs leer iej der ok nog wat van.
Ik kan ‘t neet aover mien hatte
verkriegen um dee vermakeleke vellekes van den kalender af te scheurn, want dan
bu’j ze kwiet. Dat blöksken les as ’n spannend boek en door trek iej ok gin
pagina’s uut. ’t Is ok nog ‘s ’n mooi naoslagwark. Kan good van passe komm a’j
stukskes schrieft of a’j op ’n verjeurdagvisite verlaegen zit um ’n verhaal.
Aover de toestand in de weerld, ‘t weer en de zeektes dee ons aoverkomt bu‘j
immers ok nog ’n keer uut-epraot. Onze taal dut ’t dan altied.
Geen opmerkingen:
Een reactie posten