Geschiedenis

 

‘Niet alle menschen houden van geschiedenis en sommigen noemen het een vervelend vak’. Dat schreef H.W. Heuvel in de inleiding van zien boek Geschiedenis van het Land van Berkel en Schipbeek, in 1903. Ik heure maor van weineg luu dat zee op schole ’t vak geschiedenis met plezeer volgen. A’j jong bunt dan vin iej de verhalen van vrogger bliekbaor al gauw saai. Zol dat dermet te maken hebm da’j as opschötteling nog amper zelf ‘n verleden hebt op-ebouwd? De verteller mot ‘t antrekkelek maken en interesse opwekken. Dooraover schrif Heuvel: ‘… doch bijna elk geeft gehoor als ge iets vertelt van de plaats zijner inwoning.’ Der is in honderd joor niks veranderd, dat markt iederene dee-t met ’t uutventen van historie gangs is.

Veur ons is dat boek van Heuvel interessant umdat ‘t aover ’t grensgebied tussen Salland en de Achterhoek geet. In de legereschooltied prakkerzeern ik neet aover ’t verleden dat zich tussen Barkel en Schipbaeke afspöln. De belangstelling is met de joorn egreujd. De geschiedenislessen van vrogger bint bliekbaar toch argens op-eslagen, um ze ooit weer töt laeven te wekken. Iej laest der ’s wat aover, iej kiekt anders um oe hen en a’j zelf ’s wat vertelt dan bliekt ’t geliek van Heuvel: een ieder geeft gehoor.

De zogenaamde kleine geschiedenis, dat wat dichte biej huus is gebeurd, krig veur ’n mense gaondeweg ’t older wodden meer betekenis. Nemt de weg van Gorssel naor Battem, door passeer iej ’n woud van lokale historische verhalen, dee’t wacht op oew ontdekking. De geschiedenis is hier en door zichtbaar: tolhuuskses, de anleg van de spoorlijn en café’s. Mangs mo’j wat deper graven: de moord bie de Driekieften, de eeuwm duurnde stried rond Dorth, de schole van Harfsen en Epse halverwaege beide dorpen.

Kennes van de umgeving woor wiej ons laeven laeft bliekt van belang te waen. Wiej maakt met ons allen deel uut van ’n deurlopend verhaal. Vasteleggen van wat der vandage de dag gebeurd is dus belangriek. Ok in de toekomst zal der vraoge naor ’t verleden waen en dan hef elk stuksken van de puzzel weerde.