Wiej bunt begonnen an de maond april. De maond van de herdenkingen
van oorlogslachtoffers: Joden, Sinti en Roma,
anders geaarden, soldaoten, slachtoffers van willekeur en vergelding. De verhalen
van tachteg joor trugge wodt ons elk joor van niejs verteld. Der is andach veur
op scholen, ontelbare films bunt der emaakt en op tillevisie zee’w documentaires
met nieje verhalen. Elk joor op 4 mei belaove wiej mekare dat dit nooit meer
mag gebeurn.
Uut studies naor antisemitisme bliekt dat ’t schuldeg
verklaoren van minderheidsgroepen al eeuwm suddert en nog altied steveg voortwoekert.
Eén van de oorzaken bliekt te waen de meniere woorop in de saammlaeving wodt epraot aover bepaolde
groepm. Dat herkenne wiej denk ik allemaole wel. Eén vette kop in de krante bepaolt
’t beeld aover ‘n groep, via de tam tam (tegenwoordeg de sociale media) wodt ’t
an-edikt um ‘t ons te laoten geleuven. Zo vinne wiej veur alles wat ons neet
ansteet ’n zondebok. Da’w de betrokken luu hillemaole neet kent schient niks
uut te maken. Wiej ontwikkelt onze mening an de hand van wa’w weet van heurn
zeggen.
Al eeuwmlang wodt in crisissituaties de schuld eleg bie ’n
kleine groep mensen, dee’t op basis van dat ‘heuren zeggen’ bunt in-edeeld in verdachte
categorieën. Wereldoorlog twee is veur ons ’t bekendste veurbeeld. Met de
vinger naowiezen en bedreigen is ok in onze tied schering en inslag. Der wodt makkelek
schuldegen evonn en ’t aegen geliek viert hoogtij. Solidariteit, compassie,
medemenselekheid en respect wodt aoverschreeuwd met papegaaien van dubieus
gedachtengoed en dito belangen. Dat is um bange van te wodden.
Op de aovend van 4 mei laeze wiej op grafstenen en
monumenten de namen van slachtoffers van onderdrukking en uutsluting. Dat woord
‘slachtoffers’ is ’n anonieme verzamelname. Elkene den de dupe wodden, um wee of
e was of umdat e streed veur vriejheid, mag met name enuumd wodden. Dat gif
ons ‘t besef dat ‘nooit meer’ gin loze of vriejblievende belofte kan waen. As
de tiedgeest uut de bochte dreigt te vliegn vrög dat um ’n stark teeng-geluud.
Geen opmerkingen:
Een reactie posten