Welkoop

 

‘n Tiedperk is veurbiej. Ik heb ‘t aover de Welkoopwinkel in mien darp. Dat veurbieje slöt op de aovername. Winkelbaas Herman gif ‘t stöksen aover an ‘n ander. Wellicht vraog iej oe as laezer af of dat noe zo biezunder is. Alle dage wordt immers bedrieven aover edaon an ‘n ander. Dat kan waen, maor in dit geval dut ‘t mien wat. Mien band met den winkel was anders dan met ‘n deursnee zaak, Herman kump uut ‘tzelfde nös as mien vrouw.

Veerteg jaor verkoch e van alles veur ‘t butenlaevm. De leste viefentwintig as aeng baas. Ton dat begon verandern de betrokkenheid van zien zusters en zwaogers, dat woddn intensiever. Met mekare ‘t interieur varven nao ‘n verbouwing en jaorleks in januari de winkelveurraod inventariseern, dat soort wark.

Inventaris opnemm begon op zaoterdagmeddag um vier uur, as de winkel dichte ging. Vake woddn ‘t middernach eer dat telln klaor was. De oogn stonnen ons mangs scheef in de kop van ‘t uuttelln van de lösse veurraod schruufkes, moertjes en ander klein grei. Makkeleker waarn de grote potten varve of ‘t gereedschap. Alles woddn per strekkende meter op liesten eschreevm.

‘t Veulen ‘n betjen as ‘n biebaantje, zoas jongelu dat ervaart. Wiej wolln ‘t neet missn, ok umdat ‘t gezelligheid brach en Dini op tied klaor ston met koffie, arftensoep en breudjes.

Later begonne wiej op zaoterdagmonn en ging dat telln met ‘n scanapparaat. Teegn ‘n uur of viere, at de winkel dichte ging, was meestentieds ok ons wark klaor. Veurraodbeheer geet tegenswoordig volledig digitaal. De leste jaorn kwamme wiele der neet meer an te passe.

De anhanger van de Welkoop, van groot formaat, hef ons heel wat deensten verleend. Verhuzen of afvoern naor de stortplaatse, ‘t kon allemaole, ‘t was makkelijk en der wodden dankbaar gebruuk van emaakt.

Dat is noe allemaole veurbiej. ‘t Binnenloopm bie den winkel an de Möllenweg zal miej vanaf noe ‘n ander gevuul geevm. Betrokkenheid is nostalgie ewodden.

Mangs mijmer ik aover de tokomst. Pensionado’s met de caravan op pad: familieuutje. ‘s Aovends bie ‘t kampvuur herinneringn ophaaln an vrogger, an ‘n tied den nooit meer truggekump. Den ‘olden Berndsen’ vertelt. Ik kieke dernaor uut.