Flashback

 

De kleinkinder komt inmiddels in de laeftied dat ze riejexamen gaot doon. Kóns kwam mien aegen herinnering dooran opéns in beeld. Ik was in Vorden, de auto parkeerd op ’n plekke woor-k nooit komme. Ik bun van ‘t uutprobeern van onbekende routes, bie vertrek nom ik ’n richting dén ik neet kenn. Nao ’t passeern van dree krusingen, an de rechterkant twee straotjes langs ’n grösveld. Zomaor uut ‘t niks kree’k ’n helder beeld van 55 joor elene veur oogn.

In éne van disse sträötjes mos ik too-ter-tied inparkeern. De examinator woonn door en mos thuus nog wat ophaaln, zae-t-e, ‘t kwam ‘m dus goed uut. Hee ston bekend as ’n strenge keerl. Der slaagn der maor weineg de eerste keer, was ‘t verhaal. Ik bun éénogeg wat zicht betreft, dus ’t was ’n uur lank niks anders dan links, rechts en achterumme kieken. Mien handicap wodden flink etest. Bie de krusing, woor ik noe bie toeval belanden, kwam biej ‘t wegriejen van links ’n vrouw anriejen, met ‘n kind veurop de fietse. Ik zagge dat zee ‘t derop wol waogen. Zweet veur de kop: veurrang geevm of deurdrukken! Veurzichteg drukken ik deur. Net veurdat de vrouw met eur kind an de aoverkante op de stoepe belanden, trapm ik op de rem.

De man näöst miej gräoln en ik meenn op zien gezichte ’t vermaak aover de zovölste falende leerling af te laezen. Dat is ‘ezakt‘, dach ik. Dat verandern op slag ton hee bevriejdende weurde sprok: zo, zee hef eur lesjen vandage wel eleerd. In éne keer eslaagd!

Met ’n angelsaksisch woord neume wiej zo’n terugblik ‘flashback’. In beuke en films is ‘t ’n gewilde meniere um de achtergrond van ‘n verhaal te belichten. In de psychologie betekent ’t: ’n onverwachte, laevendege herbelaeving van ‘n gebeurtenis uut ‘t verleedn.

‘t Aoverkump iederene wel ‘s, zon flits uut ’t verborgene. Een scharp streektaalwoord is miej veur dat ‘opniej belaeven’ neet bekend. Mo’w toch ’s aover naodenken, want elke taal verdeent zien aegen unieke woorden. Met ‘n exotische variant liekt ‘t of zo’n stuksken verleden neet van onszelf is.