Reigers

’n Mooien veurjoorsdag, tied veur ’n fietstochtjen, dit keer maor weer ‘s aover de uterweerden. Effen kieken hoo ’t derbie steet met de waterstand en de kieften. In ’n waelderege weije kleurt ’t lichtpeers van de pinksterbloomm. Afstappen, um ‘n bösken te plukken. Dat is al joorn traditie rond half april. Mien vrouw raekent der staevast op. ’t Wemelt inmiddels van de ooievaars dee-t luudruchteg van zich laot heurn met herkenbaar geklepper. ’n Stuksken wieterop is ’n boer an ‘t ploegen. Zo’n twinteg ooievaars kuiert achter ‘m an, um raengwörme, larven en hier en door ’n molle of moes op te pikken. ’t Plaatje mot wodden vast-eleg met de camera. Wiej bunt neet de enegen.

Onderwiel kump der ’n stel van 70plus anfietsen. Zee stapt af en kletst der vrolek op lös aover ‘t tafereel dat zich achter de boer en zien trekker afspölt. Ik heure ze verteln dat ze nog nooit zovölle ‘reigers’ bie mekare ezeen hebt en zee vindt ’t prachteg. De verschieningsvorm van de ooievaar mag töt de algemene kennes van elke landgenoot wodden eraekend, ducht miej. Wiele kiekt mekare an en vuult gin andrang um uut te leggen dat ze naor ooievaars staot te kieken. Allene an kinder leg iej nog ’n keer alles geduldeg uut.

Ooit zag en heurn ik ’n moder uutleg geevm an eur kind aover mais. ’t Was in ’n modeltuin. Zee wees tomatenplanten an um ‘t anschouwelek te maken. ’n Deel van onze landgenoten is wied vot-eraakt van ’t buutnlaevm, de natuur en woor ons voedsel vandan kump. De basale kennes, ’n klein betjen verstand dervan hebben, ontbrek. Zolange wiej in de luxe laeft dat onze kost netjes verpakt in ‘t schap van de supermarkt lig, zal door gin verandering in komm.

Dat der luu bunt dee maor wat raak kletst zonder te weetn woor zee ’t aover hebt kump vaker veur. Op elk willekeureg gebied in onze saammlaeving make wiej dat met. Met ’n betjen fantasie kö’w makkelek knollen veur citroenn verkoopm. Iej könt neet aoveral verstand van hebm, maor dat ’n ooievaar veur reiger wodt vesleetn door kan ik met de pette neet bie.